Шавкат Мирзиёевнинг Туркманистонга амалий ташрифи якунланди
Давлат раҳбари Марказий Осиё ва Озарбайжон етакчиларининг маслаҳат учрашуви ҳамда МДҲ давлат раҳбарлари кенгаши мажлисида иштирок этди.
Шавкат Мирзиёевнинг Туркманистонга амалий ташрифи якунланди. Давлат раҳбари ташриф доирасида халқаро саммитларда иштирок этиб, қатор давлат раҳбарлари билан музокаралар ўтказди.
8 октябрь куни Президент «Аваза» миллий сайёҳлик зонасида Марказий Осиё ва Озарбайжон давлат раҳбарларининг саккизинчи Маслаҳат учрашувида қатнашди. Унда саноат кооперациясини ривожлантириш, транспорт боғлиқлигини мустаҳкамлаш, янги технологияларни жорий этиш, энергетика, сув ресурслари ва экология масалаларини биргаликда ҳал қилиш бўйича таклифлар илгари сурилди. Учрашув якунида Қўшма баёнот қабул қилиниб, кўп томонлама ҳужжатлар имзоланди.
Шунингдек, Шавкат Мирзиёев Туркманистон Президенти Сердар Бердимуҳамедов билан музокаралар ўтказди. Учрашувнинг муҳим натижаси Олий даражадаги стратегик шериклик кенгашини ташкил этиш тўғрисидаги битимнинг имзоланиши бўлди.
Давлат раҳбари Арманистон Бош вазири Никол Пашинян билан ҳам учрашди. Бундан ташқари, МДҲ мамлакатлари делегациялари раҳбарлари билан биргаликда Миллий таомлар фестивалида қатнашди.
9 октябрь куни Президент МДҲ давлат раҳбарлари кенгаши мажлисида иштирок этди. Ўз нутқида савдо ва саноат ҳамкорлигини кенгайтириш, транспорт алоқаларини ривожлантириш, озиқ-овқат ва энергетика хавфсизлигини мустаҳкамлаш ҳамда кибержиноятчиликка қарши курашиш бўйича таклифларни билдирди.
Саммитнинг кенгайтирилган мажлисида Шавкат Мирзиёев Ўзбекистоннинг 2027 йилда МДҲга раислиги давридаги устувор йўналишларини баён қилди. Тадбир якунида тегишли ҳужжатлар тўплами имзоланди.
Ташриф тадбирлари якунлангач, Туркманбоши шаҳри аэропортида Ўзбекистон Президентини Туркманистон Вазирлар Маҳкамаси Раисининг ўринбосари Ботир Аннаев ва бошқа расмийлар кузатиб қўйди. Шавкат Мирзиёев Тошкентга қайтиб келди.
