ЙПХ ходимига бўйсунмади ва ҳақорат қилди: талабалар иши прокуратурага оширилди
Самарқандда ЙПХ ходимининг тўхташ ҳақидаги талабига бўйсунмай, уни ҳақорат қилган техникум ўқувчилари аниқланди.
Самарқанд вилоятининг Иштихон туманида ЙПХ ходимининг қонуний талабига бўйсунмай, уни ҳақорат қилган шахслар аниқланди. Маълум бўлишича, улар Каттақўрғон туманидаги 2-сонли техникум ўқувчилари бўлган.
Ҳуқуқбузарлик иштирокчиларининг айтишича, улар «Маlibu-2» автомобилини 1,2 миллион сўмга ижарага олиб, Иштихон туманига борган. У ерда ЙПХ ходимлари автомобилни тўхтатишни талаб қилган, бироқ ёшлар бу талабга бўйсунмай, ҳаракатни давом эттирган ва ходимлардан қочиб кетган. Шунингдек, улар ЙПХ ходимини ҳақорат қилган ҳаракатларини видеога олиб, ижтимоий тармоқларга жойлаштирган.
Ҳолат аниқлангач, ҳуқуқбузарлик содир этган ўқувчилар, автомобилни ижарага берган тадбиркор ҳамда уларнинг ота-оналари таълим муассасасига олиб келинган. Туман ҳокими, прокурори, ички ишлар бўлими бошлиғи ва бошқа масъуллар иштирокида ҳолат танқидий муҳокама қилинган.
Йиғилишда ўқувчилар ўртасида бундай ҳуқуқбузарликларнинг олдини олиш, йўл ҳаракати хавфсизлигини таъминлаш ва шу каби ҳолатлар такрорланишига йўл қўймаслик масалалари кўриб чиқилган.
Видеода ўқувчилардан бири қилган ишидан пушаймонлигини билдириб, ЙПХ ходимлари ва уларнинг оилаларидан узр сўраган. Шунингдек, ҳайдовчилик гувоҳномасини олмагунча автомобиль бошқармаслигини айтган.
Ҳолат юзасидан тўпланган ҳужжатлар қонуний қарор қабул қилиш учун прокуратура органларига юборилган.
