Япония Афғонистондаги болаларни эмлашга кўмаклашмоқда — UNICEF
Афғонистонда 21 миллиондан ортиқ одам гуманитар ёрдамга муҳтож бўлиши кутилмоқда.
Бирлашган Миллатлар Ташкилотининг Болалар жамғармаси (UNICEF) Япония ҳукумати ва халқи кўмагида Афғонистонда болаларни вакциналар ва зарур тиббий хизматлар билан таъминлашга ёрдам бермоқда.
UNICEF 26 октябрь куни маълум қилишича, ҳамкорлик болаларнинг тиббий ёрдамдан фойдаланиш имкониятларини кенгайтириш, шунингдек, полиомиелитнинг олдини олишга қаратилган.
Жамғарма Япония ҳукумати ва халқига афғон болаларини узоқ йиллардан буён қўллаб-қувватлаб келаётгани учун миннатдорчилик билдирган. Ташкилот ҳар бир бола полиомиелитдан холи келажакка лойиқ эканини таъкидлаб, эмлаш ишларини давом эттириш муҳимлигини қайд этган.
UNICEF маълумотларига кўра, Афғонистонда 21 миллиондан ортиқ одам гуманитар ёрдамга муҳтож бўлиши кутилмоқда. Кўплаб оилалар эса асосий тиббий хизматлардан фойдаланишда қийинчиликларга дуч келмоқда.
Шу сабабли болаларни эмлаш, асосий тиббий ёрдамни тақдим этиш ва аҳолининг тиббий хизматлардан фойдаланиш имкониятларини кенгайтириш бўйича саъй-ҳаракатларни давом эттириш зарур.
