Эбола хавфи сабаб АҚШга кириш талаблари ўзгармоқда: ўзбекистонликлар огоҳлантирилди
Талаб 2026 йил 3 ноябрдан кучга киради.
2026 йил 3 ноябрдан бошлаб хорижий давлатлардан АҚШга учадиган барча йўловчилар, жумладан транзит йўловчилар ҳам махсус декларация тўлдириши шарт бўлади.
“Uzbekistan Airways” матбуот хизмати маълумотига кўра, АҚШ Касалликларни назорат қилиш ва олдини олиш марказлари (СDС) томонидан жорий этилаётган талабга мувофиқ, ҳар бир йўловчи парвоздан олдинги 21 кун давомида Конго Демократик Республикаси ҳудудида бўлмаганини тасдиқлаши керак.
Декларацияни қоғоз ёки электрон шаклда тўлдириш ва имзолаш мумкин. Конго Демократик Республикаси аэропорти орқали транзитдан ўтиш, ҳатто йўловчи самолёт ёки аэропортни тарк этмаган бўлса ҳам, ушбу мамлакат ҳудудида бўлганлик ҳисобланади.
18 ёшга тўлмаган йўловчилар учун декларацияни ота-онаси, васийси ёки бошқа ваколатли шахс тўлдиради ва имзолайди.
Декларацияни тақдим этмаган йўловчилар рейсга қўйилмайди. Била туриб ёлғон маълумот бериш эса АҚШ қонунчилигига мувофиқ жиноий жавобгарликка сабаб бўлиши мумкин.
Йўловчиларга талаблар билан олдиндан танишиш ва декларацияни аэропортга келишдан аввал тайёрлаб қўйиш тавсия этилган.
