АҚШ Украинага Patriot ракеталарини сотади: шартнома қиймати 2,1 млрд доллар
Келишув доирасида Украина 500 дона Patriot PAC-3 ракетасини олади.
АҚШ Давлат департаменти Украинага 500 дона Patriot PAC-3 ракетасини 2,1 миллиард долларга сотишни маъқуллади. Бироқ ракеталар Киевга 2030 йилларнинг дастлабки йилларидагина етказиб берилиши кутилмоқда.
Reuters хабарига кўра, бу Дональд Трампнинг иккинчи президентлик муддати бошланганидан буён Украинани мудофаа қуроллари билан таъминлаш борасидаги муҳим қадамлардан бири бўлиши мумкин.
Украина Россия томонидан учирилаётган баллистик ракеталарни уриб тушириш учун қўшимча Patriot ракеталарига эҳтиёж сезмоқда. Президент Володимир Зеленский аввалроқ АҚШнинг муҳим ракета етказиб бериш бўйича қарорини қарийб бир ойдан бери кутаётганини билдирган эди.
Бироқ қурол-яроғ етказиб бериш шартномалари одатда бир неча йил давом этади. АҚШ қароридан хабардор манбаларга кўра, ҳали ишлаб чиқарилмаган ракеталар Украинага 2030 йилларнинг бошларида етиб бориши мумкин. Украина Мудофаа вазирлиги эса етказиб бериш муддатини тезлаштириш учун Пентагон билан музокара олиб бормоқда. Хусусан, АҚШ арсеналидаги мавжуд ракеталарни вақтинча Украинага бериш ва кейинчалик уларнинг ўрнини янги ишлаб чиқарилганлари билан тўлдириш варианти ҳам кўриб чиқилмоқда.
Ракеталар хариди Канада, Германия ва Норвегиянинг JUMPSTART дастури орқали ажратадиган маблағлари ҳамда Европа Иттифоқининг Украинани қўллаб-қувватлаш кредити ҳисобидан молиялаштирилади.
Маълумот учун, Patriot тизими тез ҳаракатланувчи баллистик ракеталарга қарши қўлланадиган энг самарали мудофаа воситаларидан бири ҳисобланади. Ракеталарнинг асосий ишлаб чиқарувчиси Lockheed Martin компаниясидир.
Аввалроқ, июль ойида АҚШ армияси ушбу компания билан Patriot ракеталарини ишлаб чиқариш бўйича қиймати 58,6 миллиард долларгача бўлган шартнома тузган эди. Келишувга кўра, 2030 йил охиригача PAC-3 MSE ракеталарини ишлаб чиқариш қувватини уч баравар ошириш режалаштирилган.
