Сунъий интеллект пул ишлаш учун крипто-биржаларни бузиши мумкин — Илон Маск
Илон Маск Binance крипто-биржасига қилинган хакерлик ҳужуми ортидан сунъий интеллектнинг келажакдаги имкониятлари ва хавфлари ҳақида фикр билдирди.
Америкалик тадбиркор Илон Маск сунъий интеллект келажакда инсонлар назоратидан чиқиб, ўз даромадини ошириш мақсадида крипто-биржаларни бузиши ва фирибгарлик билан шуғулланиши мумкинлигини айтди, дея ёзмоқда Point.md.
Маск бу ҳақда Х ижтимоий тармоғида Binance крипто-биржасига уюштирилган хакерлик ҳужуми ҳақидаги тахминларга муносабат билдирар экан, ёзди.
Унга кўра, хакер мураккаб алгоритмлардан фойдаланган. Жумладан, музлатилган USDT маблағларини гаров сифатида ишлатиб, блокланмаган ETH кредитларини олишга уринган бўлиши мумкин.
“Қачондир суперинтеллектуал агентлар буни инсонлар учун эмас, балки ўзлари учун валюта ишлаб топиш мақсадида амалга оширади”, — деб ёзди Маск.
Аввалроқ Binance асосчиси Чанпен Чжао биржага хакерлик ҳужуми уюштирилганини тасдиқлаб, ҳолат юзасидан тергов бошланганини маълум қилган эди. Унинг сўзларига кўра, хавфсизлик бўйича мутахассислар келиб тушаётган маълумотларни зудлик билан текширмоқда.
Биржа раҳбарияти хавфсизлик билан боғлиқ ҳодиса оқибатидаги зарарни 6,3 миллиард долларга баҳолаган.
Шундан сўнг платформа вакиллари эҳтиёт чораси сифатида фойдаланувчиларнинг ҳисобларини тўлдириш ва маблағ ечиб олиш операциялари вақтинча тўхтатилганини билдирган.
