Россия Туркий давлатлар ташкилотига қўшиладими? Тўқаев таклиф билан чиқди
Анқарада ўтган ТДТ саммитида Қозоғистон президенти Россияни ташкилотга кузатувчи сифатида таклиф қилиш ташаббусини илгари сурди.
Қосим-Жомарт Тўқаев Россияни Туркий давлатлар ташкилоти (ТДТ) фаолиятига жалб этиш таклифини билдирди.
У бу ҳақда Анқарада бўлиб ўтган ТДТ саммитида сўз юритган. Тўқаевнинг фикрича, Россияни ташкилотга қўшилишга ёки унинг фаолиятида кузатувчи сифатида иштирок этишга таклиф қилиш мақсадга мувофиқ бўлади.
Қозоғистон раҳбари Россия асрлар давомида туркий дунё билан яқин алоқаларни сақлаб келганини таъкидлаган. Унинг қайд этишича, мамлакатда кўплаб туркий халқлар яшайди. Шунингдек, Россия «Олтой — туркий цивилизация бешиги» лойиҳасини илгари сурмоқда.
Тўқаев Россиянинг ташкилот фаолиятидаги иштироки барча аъзо давлатлар учун манфаатли бўлиши мумкинлигини билдирган.
Аввалроқ Тўқаев Туркия Президенти Ражаб Тоййиб Эрдоған билан учрашиб, икки мамлакат ўртасидаги муносабатларни абадий дўстлик даражасига кўтариш ҳақида баёнот берган эди.
