Бухорода 105 миллион долларлик туризм маркази қурилмоқда: 2 мингта иш ўрни яратилади
Мажмуада меҳмонхоналар, оилавий меҳмон уйлари, музей, амфитеатр ва ҳунармандчилик марказлари ташкил этилади.
Президент Шавкат Мирзиёев Бухоро шаҳрида барпо этилаётган янги туризм марказида олиб борилаётган бунёдкорлик ишлари билан танишди.
Лойиҳа қадимий Бухоронинг тарихий обидалари, ҳунармандчилик ва гастрономия анъаналарини замонавий хизматлар билан уйғунлаштириш, шунингдек, шаҳарда йирик халқаро маданий ва ишбилармонлик тадбирларини ўтказиш учун шароит яратишга қаратилган.
Мажмуа 50 гектар майдонда қурилмоқда. Лойиҳага жами 105 миллион доллар инвестиция йўналтирилиши режалаштирилган.
Лойиҳага кўра, ҳудудда қабуллар уйи, кўргазмалар зали, музей, иккита замонавий меҳмонхона, 80 та оилавий меҳмон уйи, 2 минг ўринли амфитеатр ҳамда 70 дан ортиқ савдо ва хизмат кўрсатиш шохобчаси барпо этилади. Шунингдек, сайилгоҳлар, ҳунармандчилик марказлари ва сунъий кўл ташкил қилинади.
Ҳозирда марказнинг 10 гектар майдонида муҳандислик-коммуникация тармоқларини қуриш ишлари олиб борилмоқда. Бу жараёнга 50 га яқин махсус техника жалб қилинган.
Мажмуа тўлиқ ишга тушгач, 2 мингта иш ўрни яратилиши ва Бухорога қўшимча 2 миллиондан ортиқ сайёҳ жалб этилиши кутилмоқда. Ҳисоб-китобларга кўра, маҳаллий буджетга йиллик тушум 288 миллиард сўмни ташкил этиши мумкин.
Президент лойиҳанинг аҳамияти фақат бинолар қурилиши билан чекланмаслиги, балки Бухоронинг бой тарихий ва маданий меросини дунёга кенгроқ танитиш, маҳаллий аҳолига янги иш ўринлари ва даромад манбаларини яратишга хизмат қилиши кераклигини таъкидлади.
Давлат раҳбари лойиҳани шу мақсадлардан келиб чиқиб амалга ошириш бўйича топшириқлар берди.
Шу ернинг ўзида Бухоро инфратузилмасини 2027 йилда ўтказилиши режалаштирилган саммитларга пухта тайёрлаш юзасидан мутасаддиларнинг ахборотлари тингланиб, тегишли вазифалар белгиланди.
