Глобал ҳарорат яна кўтарилди: 2026 йил энг иссиқ иккинчи йил бўлиши мумкин

 

Европа иқлим хизмати — Коперникнинг янги ҳисоботига кўра, 2026 йил кузатувлар тарихидаги иккинчи энг иссиқ йил бўлиши эҳтимоли тахминан 80 фоизни ташкил этмоқда. Шу билан бирга, унинг 2024 йилдаги рекордни такрорлаши ёки ундан ҳам ошиб кетиши эҳтимоли 20 фоиз деб баҳоланмоқда.

 

6 ноябрь куни эълон қилинган тадқиқотда қайд этилишича, 2026 йил октябрь ойи кузатувлар тарихидаги энг иссиқ октябрь бўлган. Бу ойда ўртача глобал ҳарорат 15,35 даража Цельсийни ташкил этиб, 1850–1900 йиллардаги саноатгача бўлган давр кўрсаткичидан 1,75 даражага юқори бўлган.

 

Шунингдек, глобал ҳарорат кетма-кет учинчи ой давомида 1,5 даражали чегарадан ошган.

 

Олимлар 2026 йил давомида ўртача глобал ҳарорат саноатгача бўлган давр даражасидан 1,56–1,61 даража юқори бўлишини прогноз қилмоқда. Йил якунида ҳароратнинг 1,5 даражали чегарадан ошиши эҳтимоли 99 фоиздан юқори деб баҳоланмоқда.

 

Океанларда ҳам ҳарорат юқорилигича қолмоқда. Октябрь ойида қутб минтақаларидан ташқаридаги денгиз юзаси ҳарорати ўртача 20,95 даражага етиб, ушбу ой учун рекорд кўрсаткични қайд этган.

 

Экваториал Тинч океанида сув юзаси ҳароратининг кўтарилиши билан боғлиқ табиий ҳодиса — Эль-Ниньо ҳам глобал ҳароратнинг ошишига қўшимча таъсир кўрсатмоқда.

 

Мутахассислар, шунингдек, 2023–2026 йиллар оралиғидаги тўрт йиллик давр учун ўртача глобал ҳарорат ҳам саноатгача бўлган даражадан илк бор 1,5 даражадан кўпроқ юқори бўлишини кутмоқда.