Покистонда тўғон тўсиғи қулади: қурилиш майдонини сув босди
Дастлабки маълумотларга кўра, ҳодиса оқибатида ҳеч ким жароҳатланмаган ва ҳалок бўлмаган.
Покистоннинг Тарбела тўғонини кенгайтириш лойиҳаси доирасида қурилиш ишлари олиб борилаётган ҳудудда ҳимоя дамбаси ўпирилиб, сув омборидан катта миқдорда сув оқиб чиқди. Ҳодиса оқибатида ҳудудни сув босган.
Dawn нашрининг хабар беришича, воқеа душанба куни мамлакатнинг Харипур шаҳри яқинидаги Тарбела тўғонининг бешинчи кенгайтириш гидроэнергетика лойиҳаси — T-5 ҳудудида юз берган. Қулаш қурилиши ҳали якунланмаган 5-сонли туннель яқинидаги ҳимоя иншоотида содир бўлган.
Ҳодиса вақтида ҳудудда қазиш ишлари олиб борилаётган бўлган. Сувнинг тўсатдан оқиб келиши ортидан фавқулодда вазият эълон қилиниб, қурилиш ишлари тўхтатилган. Барча ишчилар хавфсиз жойга эвакуация қилинган.
Дастлабки маълумотларга кўра, ҳодиса оқибатида ҳеч ким жароҳатланмаган ва ҳалок бўлмаган.
Ҳозирда ҳимоя дамбасининг қулаш сабаблари ўрганилмоқда. Дастлабки хабарларда иншоот нима сабабдан ўпирилиб тушгани ҳақида аниқ маълумот берилмаган.
