Россиянинг саккизта ҳудудида мигрантлар таксичилик қила олмаслиги мумкин: ўзбекистонликларга таъсир қилиши мумкин

 

Россияда 2027 йилдан бошлаб саккизта минтақада хорижий фуқароларнинг такси ҳайдовчиси сифатида ишлашига тақиқ жорий этилиши мумкин. Бу Ўзбекистон фуқароларига ҳам таъсир қилиши эҳтимоли бор.

 

Россия Меҳнат вазирлиги томонидан тайёрланган лойиҳа Мордовия, Татаристон, Удмуртия, Чувашия, Оренбург, Свердловск ва Уляновск вилоятлари, шунингдек, Яҳудий автоном вилоятида хорижий ишчиларни такси ҳайдовчиси сифатида ёллашни чеклашни назарда тутади.

 

Чекловлар Евроосиё иқтисодий иттифоқига аъзо давлатлар — Арманистон, Беларус, Қозоғистон ва Қирғизистон фуқароларига татбиқ этилмайди. Шу сабабли Ўзбекистон фуқаролари янги тартиб кучга кирган тақдирда чекловларга дуч келиши мумкин.

 

Россияда вақтинчалик ёки доимий яшаш рухсатномасига эга чет элликлар, шунингдек, юқори малакали мутахассислар учун истиснолар белгиланган.

 

Лойиҳа такси хизматидан ташқари бошқа соҳаларни ҳам қамраб олади. Мордовия ва Удмуртияда шаҳар ва шаҳар атрофи йўловчи ташиш ҳамда автомобиль юк ташиш соҳаларида, Оренбург вилоятида эса шаҳар ва шаҳар атрофи транспортида хорижий ишчилар улушини чеклаш таклиф этилган. Калуга вилоятида курьерлик хизматларига ҳам чеклов қўлланиши мумкин.

 

Россия Меҳнат вазирлиги чекловлар ҳар бир иш берувчига алоҳида татбиқ этилишини билдирган. Яъни компаниялар белгиланган меъёрдан ортиқ хорижий ишчини ёллай олмайди.

 

Мордовия расмийлари ташаббус заруратини чет элликлар иштирокидаги йўл-транспорт ҳодисалари, ноқонуний такси ёллаш ҳолатлари ва бошқа қонунбузарликлар билан изоҳлаган.

 

Ҳозирча ҳужжат қарор лойиҳаси ҳисобланади. У октябрь ойи охирида Россия уч томонлама комиссияси томонидан маъқулланган. Янги қоидалар кучга кириши учун Россия бош вазири Михаил Мишустин томонидан имзоланиши керак.