Туркиядаги пўлат заводида портлаш: 16 киши ҳалок бўлди
Ҳодиса юзасидан тергов бошланиб, 5 киши ҳибсга олинган.
Туркиянинг Измир вилояти Алиага туманидаги пўлат заводида юз берган портлаш оқибатида 16 киши ҳалок бўлди. Яна 13 киши жароҳатланган, улардан икки нафарининг аҳволи оғир. Бу ҳақда президент Ражаб Тоййиб Эрдўған Анқарада Вазирлар Маҳкамаси йиғилишидан кейин маълум қилган.
Портлаш 9 ноябрь куни маҳаллий вақт билан соат 11:30 атрофида Чакмакли маҳалласидаги Отатурк кўчасида жойлашган заводда содир бўлган.
Дастлабки маълумотларга кўра, фавқулодда ҳолат корхона цехларидан биридаги электр ёйли печ билан боғлиқ жараён вақтида эриган металл тўкилиши ортидан юзага келган. Оқибатда бино деярли бутунлай вайрон бўлган, ҳодиса жойидан бир неча километр узоқликдан ҳам кўринадиган қуюқ тутун кўтарилган.
Эрдўғаннинг айтишича, Энергетика ва табиий ресурслар, шунингдек, Меҳнат ва ижтимоий ҳимоя вазирлари воқеадан сўнг зудлик билан Измирга етиб борган.
Туркия президенти ҳодиса юзасидан тергов олиб борилаётганини билдирган. Унинг таъкидлашича, фожианинг сабаблари, юзага келиш шароитлари ва айбдорлар аниқланади.
Хабарларга кўра, тергов доирасида полиция беш кишини ҳибсга олган. Шунингдек, айрим одамлар вайроналар остида қолиб кетгани ҳақида хабар берилган.
