Президент Навоий вилоятининг собиқ ҳокими вафоти муносабати билан ҳамдардлик билдирди
Баҳриддин Рўзиев Навоий вилоятининг ижтимоий-иқтисодий ривожи, “Навоий” эркин индустриал-иқтисодий зонаси ва халқаро логистика марказини ташкил этиш ишларига ҳисса қўшган.
Давлат ва жамоат арбоби, Навоий вилоятининг собиқ ҳокими, меҳнат фахрийси Баҳриддин Муртазаевич Рўзиев 11 ноябрь куни 76 ёшида вафот этди. Бу муносабат билан Ўзбекистон Президенти ҳамдардлик билдирди.
Баҳриддин Рўзиев 1950 йил 23 августда Қашқадарё вилоятининг Чироқчи туманида туғилган. Меҳнат фаолиятини Кармана тумани йўл қурилиши бирлашмасида авточилангар сифатида бошлаган. Ишлаб чиқаришдан ажралмаган ҳолда Тошкент политехника институтида муҳандис-механик мутахассислиги бўйича таҳсил олган. Кейинчалик Москва ижтимоий фанлар академиясида ҳам ўқиган.
У Навоий вилоятида ёшлар ташкилотлари ва турли бошқарув идораларида масъул лавозимларда ишлаган. Мустақилликнинг дастлабки йилларида Навоий вилояти газлаштириш бошқармаси ва ҳудудий коммунал фойдаланиш бошқармасига раҳбарлик қилган, Конимех тумани ҳокими лавозимида фаолият юритган.
2002 йилда Навоий вилояти ҳокими этиб тайинланган Баҳриддин Рўзиев ҳудуднинг ижтимоий-иқтисодий ривожланиши, саноат ва ишлаб чиқариш соҳаларини кенгайтириш, инвестициялар жалб қилиш, фермерлик ҳаракатини шакллантириш ҳамда аҳолини ижтимоий ҳимоя қилиш йўналишларида фаолият олиб борган.
У, айниқса, «Навоий» эркин индустриал-иқтисодий зонасини ташкил этиш ва Навоий халқаро аэропорти негизида халқаро логистика марказини барпо қилиш ишларига катта ҳисса қўшган.
Кейинги йилларда фахрийлар ташкилоти аъзоси сифатида ҳам жамоат ишларида фаол қатнашган. Бой тажрибаси ва маслаҳатлари билан турли соҳаларни ривожлантириш, ёш кадрларни тарбиялаш ҳамда уларни ватанпарварлик руҳида камол топтиришга қаратилган тадбирларда иштирок этган.
Президент ҳамдардлик мурожаатида Баҳриддин Рўзиевни таниқли давлат ва жамоат арбоби, самимий ва камтарин инсон, ёшларнинг меҳрибон устози сифатида эътироф этиб, унинг хотираси қалбларда ҳамиша сақланиб қолишини таъкидлади.
