Арманистон–Озарбайжон тинчлиги ва истеъфо: Пашинян келажакдаги режалари ҳақида гапирди
Арманистон бош вазири Озарбайжон билан тинчлик ўрнатилгач, ўз миссиясини бажарилган деб ҳисоблашини айтди.

Арманистон бош вазири Никол Пашинян Озарбайжон билан тинчлик шартномаси имзоланиб, ратификация қилингач, ўз миссиясини бажарилган деб ҳисоблашини ва истеъфога чиқишга тайёрлигини маълум қилди.
Пашиняннинг таъкидлашича, тинчлик шартномасининг имзоланиши ва ратификация қилиниши институционал тинчликни таъминлашдаги асосий вазифа ҳисобланади. Шундан кейин у лавозимни тарк этиши мумкин.
Бош вазир, шунингдек, Арманистон фуқаролари референдумда янги Конституцияни рад этган тақдирда ҳам истеъфога чиқишга тайёрлигини билдирган. Унинг сўзларига кўра, кейинги сиёсий жараёнлар бўйича қарор мамлакат фуқароларига тегишли.
Пашинян янги Конституция қабул қилингач, Озарбайжон билан тинчлик шартномаси имзоланиши ва ратификация қилинишига кафолат борлигини айтиб, бу борадаги масъулиятни ўз зиммасига олишга тайёрлигини таъкидлаган.
Арманистон ва Озарбайжон ўртасидаги тинчлик шартномаси матни 2025 йил 11 августда эълон қилинган. Кейинчалик томонлар Вашингтонда АҚШ президенти Дональд Трамп иштирокида ҳужжатни парафлаган. Бироқ шартнома ҳали расман имзоланмаган.
Бокунинг талабларига кўра, Арманистон Конституциясига Озарбайжон суверенитети ва ҳудудий яхлитлигига даъво сифатида талқин қилинадиган қоидаларни ўзгартириш ҳамда ЕХҲТ Минск гуруҳини тугатиш масалалари ҳал этилиши керак.
Арманистон ва Озарбайжон ўртасидаги келишув нафақат Қорабоғ масаласини, балки давлат чегараларини делимитация ва демаркация қилиш ҳамда дипломатик алоқаларни ўрнатишни ҳам қамраб олади.







