AI-80 бўйича чеклов сақланади: Энергетика вазирлиги сабабини тушунтирди
Биржа савдоларига чиқарилган бензиндан юқори октанли бензин ва бошқа кимёвий маҳсулотлар ишлаб чиқаришда фойдаланилади.

Ўзбекистондаги автомобилларга ёқилғи қуйиш шохобчаларида AI-80 бензини сотувига қўйилган чекловлар сақланиб қолади. Энергетика вазирлиги ижтимоий тармоқларда тарқалган хабарларга муносабат билдирди.
Вазирлик маълум қилишича, биржа савдоларига чиқарилган AI-80 маркали бензин қайта ишлаш корхоналарида хомашё сифатида фойдаланиш учун мўлжалланган.
Ушбу маҳсулот технологик қайта ишлаш орқали юқори октанли бензин ва бошқа кимёвий маҳсулотлар ишлаб чиқаришда қўлланилиши мумкин. Савдо шартларига кўра, уни фақат тегишли лицензияга эга қайта ишлаш корхоналари харид қилиши мумкин.
Вазирлик таъкидлашича, мазкур савдолар AI-80 бензинининг АЁҚШларда сотувга қайтарилишини англатмайди. Уни автомобилларга ёқилғи сифатида сотиш бўйича амалдаги чекловлар сақланиб қолади.








