Маҳаллий қурилиш материаллари қўллаб-қувватланади: 200 млн долларлик имтиёзли кредит линияси очилади
Президент 31 та лойиҳа институтининг фаолиятини замон талабларига мослаштириш, уларга замонавий технологиялар ва илғор ечимларни жорий этиш зарурлигини таъкидлади.

Янги Тошкентдаги қурилишларни маҳаллий маҳсулотлар билан таъминлаш ва маҳаллий қурилиш материалларининг рақобатбардошлигини ошириш бўйича қўшимча чоралар белгиланди.
Янги Тошкентда йирик қурилиш ишларини амалга ошираётган девелоперларнинг айланма маблағга эҳтиёжини қоплаш учун ўн кун ичида 200 миллион долларлик имтиёзли кредит линияси очилади. Ушбу маблағлар фақат маҳаллий қурилиш материалларини харид қилишга йўналтирилади.
Учрашувда маҳаллий корхоналар сифат кўрсаткичлари текширилмаган арзон импорт маҳсулотлари билан рақобатлашаётгани, бироқ уларнинг маҳсулотларини синовдан ўтказиш учун лабораториялар етишмаслиги қайд этилди.
Аҳолини сифатсиз ва саломатлик учун хавфли маҳсулотлардан ҳимоя қилиш мақсадида Тошкент шаҳри, Фарғона ва Самарқандда учта замонавий лаборатория ташкил этилади. Мутасаддиларга бир ой муддатда лабораториялар жойлашувини аниқлаш ва уларни келаси йил ишга тушириш топширилди.
Президент янги қурилиш материаллари ва инновацион технологияларни амалиётга жорий этиш масаласига ҳам тўхталди.
Учрашув олдидан намойиш этилган кўргазмада маҳаллий корхоналарнинг инновацион маҳсулотлари тақдим қилинди. Жумладан, “бетон гилам” деб аталувчи гидроизоляция материали каналларни анъанавий бетонлашга нисбатан икки баробар тез ва 30 фоиз арзон қуриш имконини беради.
“Биздаги 31 та лойиҳа институти дунёқарашини ўзгартириши, замонга мослашиши керак”, — деди давлат раҳбари.
Шунингдек, Президент учрашувда қатнашаётган инвесторлар ушбу институтларни бошқарувга олиб, уларга замонавий технологиялар ва илғор ечимларни олиб кириш бўйича таклифлар билан чиқса, уларни кўриб чиқишга тайёрлигини билдирди.








