Зеленский Путинга очиқ хат йўллаб, учрашув таклиф қилди
Украина президенти учрашув учун нейтрал майдон сифатида Швейтсария, Туркия ёки араб давлатларидан бирини таклиф қилган.
Украина президенти Владимир Зеленский Россия президенти Владимир Путинга очиқ хат йўллаб, можарони тинч йўл билан ҳал этиш мақсадида шахсий учрашув ўтказишни таклиф қилган.
Украина Ташқи ишлар вазири Андрей Сибиганинг маълум қилишича, мазкур хат дипломатик каналлар орқали Россия томонига юборилмоқда.
Мурожаатда Зеленский Украина томони тўлиқ сулҳ тузиш ҳамда “ҳамма-ҳаммага” тамойили асосида ҳарбий асирларни алмашишга тайёр эканини билдирган. Шунингдек, у музокаралар жараёнида АҚШ ва Европа давлатлари вакиллари ҳам иштирок этиши лозимлигини қайд этган.
Украина президенти эҳтимолий учрашув учун нейтрал майдон сифатида Швейтсария, Туркия ёки араб давлатларидан бирини таклиф қилган. Унга кўра, айнан ҳозирги вазият дипломатик мулоқотни бошлаш учун имконият яратмоқда.
Кремл матбуот котиби Дмитрй Песков Россия томони хат билан танишганини, бироқ президент Путин ҳали унинг мазмунини кўриб чиқишга улгурмаганини маълум қилган. Унинг сўзларига кўра, тегишли маълумот кейинчалик давлат раҳбарига етказилади.
