Андижонда боласини ургани учун эркак қўшнисининг фарзандини аёвсиз калтаклади
Ижтимоий тармоқларда тарқалган видео ортидан ИИВ ҳолатга изоҳ берди.
Ижтимоий тармоқларда вояга етмаган болага нисбатан жисмоний куч ишлатилгани акс этган видеолар тарқалиши ортидан Ички ишлар вазирлиги Хавфсизлик хизмати мазкур ҳолат юзасидан расмий маълумот берди.
Қайд этилишича, жорий йил 18 июнь куни соат 15:05 да Андижон вилояти Шаҳрихон туманида яшовчи 46 ёшли фуқаро T.И. «102» қисқа рақамига мурожаат қилиб, 9 ёшли ўғлига тан жароҳати етказилганини маълум қилган. Мурожаат ортидан ички ишлар органлари ходимлари воқеа жойига етиб бориб, ҳолат юзасидан суриштирув ишларини бошлаган.
Дастлабки маълумотларга кўра, 2016 йилда туғилган икки нафар вояга етмаган бола ўртасида келишмовчилик келиб чиқиб, улар ўзаро муштлашиб кетган. Шундан сўнг болалардан бирининг отаси — 1988 йилда туғилган M.Б. можарога аралашиб, жанжални бартараф этиш ўрнига қўшнисининг фарзандига бир неча бор қўл кўтарган.
Оқибатда 9 ёшли бола тан жароҳати олган.
Ҳозирда Шаҳрихон тумани ички ишлар бўлими томонидан мазкур ҳолат юзасидан терговга қадар текширув ҳаракатлари олиб борилмоқда. Воқеанинг барча тафсилотлари атрофлича ўрганилиб, якуний хулосалар асосида иштирокчиларнинг хатти-ҳаракатларига қонунчиликда белгиланган тартибда ҳуқуқий баҳо берилиши маълум қилинди.
Қўшимча маълумотлар текширув якунлари бўйича эълон қилинади.
