“Яна иккита урушни тугатишга яқинмиз” — Трамп
АҚШ президенти Россия ва Украина ўртасидаги уруш якунига яқинлашаётганини таъкидлади.
Дональд Трамп Россия ва Украина ўртасидаги уруш ҳамда АҚШ ва Эрон ўртасидаги можаро якунига яқинлашаётганини билдирди. Унинг айтишича, ҳар икки можаро тез орада тугаши мумкин.
Трамп бу ҳақда Айова штатида тарафдорлари олдида қилган нутқида маълум қилди.
АҚШ президенти аввал бошланган ёки бошланиши мумкин бўлган саккизта урушни ҳал қилганини айтиб, яна иккита можарога чек қўйишга яқин эканини таъкидлаган. У Россия ва Украина ўртасидаги уруш ҳам шу босқичга яқинлашаётганини билдирган.
Шунингдек, y Эрон билан можаро ҳам яқин орада якунланишини тахмин қилган. Унинг сўзларига кўра, можаро қандай якунланишидан қатъи назар, бу жараён энергия ресурслари нархларининг пасайишига олиб келиши мумкин.
Трампнинг баёнотига кўра, урушларнинг тугаши нефть ва бензин нархларига ҳам таъсир кўрсатиши кутилмоқда.
Айни пайтда Россия президенти Владимир Путин Россиянинг Украина бўйича уч томонлама музокараларга қайтишга тайёрлигини билдиргани ҳақида хабарлар тарқалган. Тинчлик келишуви доирасида хавфсизлик масалаларини муҳокама қилиш ҳам кутилмоқда.
