Исроилда норозилик: минглаб одам Нетаньяху ҳукуматига қарши намойишга чиқди

Исроилнинг Тель-Авив шаҳрида 24 октябрь куни бош вазир Бинямин Нетаньяху ҳукуматига қарши минглаб одам иштирокида норозилик намойиши бўлиб ўтди. Намойишчилар 2023 йил 7 октябрь куни ҲАМАС ҳужумининг олдини ололмаган хавфсизлик тизимидаги камчиликларни мустақил текширишни ва масъулларни жавобгарликка тортишни талаб қилди. 

 

Акция 27 октябрь куни бўлиб ўтадиган парламент сайловига уч кун қолганида ташкил этилди. Намойишга 2023-йилги ҳужум қурбонлари ва гаровга олинганларнинг оила аъзолари томонидан тузилган Октябрь кенгаши ташаббус кўрсатди.

 

Намойишчилар Тель-Авивдаги Рабин майдонидан Гаровдагилар майдони томон юриш қилди. Улар ҳукуматдан 7 октябрь ҳужумига олиб келган хавфсизликдаги камчиликлар юзасидан давлат тергов комиссиясини тузишни талаб қилди.

 

Октябрь кенгаши намойиш олдидан Х ижтимоий тармоғида эълон қилган баёнотида акцияни ҳақиқатни аниқлаш ва масъулларни жавобгарликка тортиш йўлидаги уч йиллик курашнинг муҳим босқичи деб атади.

 

Қайд этилишича, Нетаньяху ҳукумати мустақил давлат тергов комиссиясини тузишдан бош тортиб келмоқда. Ҳукумат бунинг ўрнига парламентдаги ҳукмрон коалиция ва мухолифат вакиллари иштирокида комиссия ташкил этишни таклиф қилган. Мухолифат етакчилари эса сиёсатчилар томонидан шакллантириладиган комиссия ишида қатнашмасликларини билдирган.

 

The Times of Israel нашрининг хабар беришича, намойишда мухолифатдаги бир қатор сиёсий арбоблар, жумладан, Яир Голан, Авигдор Либерман, Нафтали Беннетт ва Яир Лапид ҳам иштирок этган.