Автобусдаги реклама йўловчиларга халақит бермаслиги керак — Тошшаҳартрансхизмат

Тошкент шаҳридаги автобусларда намойиш этиладиган реклама роликларининг овоз баландлиги пасайтирилиши тавсия қилинди. Бу ҳақда «Тошшаҳартрансхизмат» АЖ ахборот хизмати маълум қилди.

Компания маълумотига кўра, автобус салонларидаги мониторларда реклама намойиш этиш учун ажратилган жойлар «Э-аукцион» электрон савдо платформасида ўтказилган аукцион ғолибига ижара асосида берилган.

Сўнгги вақтларда ижтимоий тармоқларда автобуслардаги реклама роликлари овозининг баландлиги юзасидан йўловчилар эътироз ва таклифларини билдирган. Мурожаатларни инобатга олган ҳолда, «Тошшаҳартрансхизмат» вакиллари реклама жойларини ижарага олган тадбиркорлик субъекти билан учрашув ўтказган.

Унда реклама овозининг йўловчиларга таъсири ва жамоат транспортида қулай муҳитни таъминлаш масалалари муҳокама қилинган. Реклама овозини меъёрида сақлаш, йўловчиларнинг ўзаро мулоқоти ва ҳайдовчининг хизмат фаолиятига халақит бермайдиган шароит яратиш муҳимлиги таъкидланган.

Учрашув якунида тадбиркорлик субъекти вакилларига реклама роликлари овозини пасайтириш, йўловчиларга ортиқча шовқин ва ноқулайлик туғдирмаслик юзасидан тавсия ва кўрсатмалар берилган.

«Тошшаҳартрансхизмат» АЖ мазкур масала назоратга олинганини билдириб, реклама намойиши жараёнида йўловчилар манфаатларини таъминлаш ва жамоат транспортида қулай муҳитни сақлашга эътибор қаратилаётганини маълум қилди.