Тошкентда ҳаво сифати “носоғлом” даражада: бунга нима сабаб бўлди?
Ҳаво сифати махсус комиссия томонидан доимий кузатиб борилмоқда.
25 октябрдан 26 октябрга ўтар кечаси Тошкент шаҳрида ноқулай метеорологик шароитлар сабаб ҳаво сифати ёмонлашди. PМ2.5 ва PМ10 заррачалари миқдори ортиб, айрим кузатув пунктларида ҳаво ифлосланиши халқаро ҳаво сифати индекси бўйича «носоғлом» ва “жуда носоғлом” даражаларга етди.
Экология қўмитаси маълумотига кўра, тунда ҳароратнинг кескин пасайиши, шамолнинг кучсизлиги ва кучли ҳарорат инверсияси атмосферанинг қуйи қатламларида ҳаво алмашинувини чеклаган. Натижада майда чанг заррачалари ер юзасига яқин қатламда тўпланиб, ифлосланиш тун давомида ва эрталаб ҳам юқори даражада сақланган.
Метеосат сунъий йўлдоши тасвирларида 26 октябрь соат 00:00 дан 08:00 гача Тошкент ва унга туташ ҳудудларда ҳавода чанг кузатилгани қайд этилган.
Шунингдек, тун давомида махсус мобил лаборатория ёрдамида атмосфера ҳавоси инструментал ўлчовлардан ўтказилган. Кузатув пунктларининг аксариятида PМ2.5 майда дисперс заррачалари билан ифлосланиш халқаро АQI бўйича «носоғлом» ва “жуда носоғлом” тоифаларга мос келгани аниқланган.
Миллий ҳаво сифати индекси бўйича эса Тошкентда PМ2.5 кўрсаткичи «сариқ», PМ10 кўрсаткичи “тўқ сариқ” даражада бўлган.
Маълумотга кўра, бугун кун давомида ҳам ҳаво сифати халқаро АQI бўйича «носоғлом», миллий индекс бўйича эса «сариқ» даражада сақланиши кутилмоқда.
