AI миллиардлаб ўлимга сабаб бўлиши мумкин — Билл Гейтс

Microsoft асосчиси Билл Гейтс сунъий интеллект ёмон ниятли шахслар томонидан қўлланилган тақдирда, миллиардлаб одамларнинг ўлимига олиб келадиган воқеаларни юзага келтириш учун етарлича кучли бўлиши мумкинлигидан огоҳлантирди. У бу ҳақда NBC телеканалининг “Meet the Press” дастурига берган интервьюсида маълум қилган.

Гейтснинг айтишича, инсоният илгари “ёмон ниятли одамлар ва энг янги сунъий интеллект воситалари” уйғунлигидек кучли қуролга эга бўлмаган. У AI’дан зарарли мақсадларда фойдаланиш кенг кўламли оқибатларга олиб келиши мумкинлигини таъкидлаган.

У сунъий интеллект компанияларининг технологияни ўзлари назорат қилиши етарли эмаслигини билдирган. Унинг фикрича, ҳукуматлар, ҳуқуқни муҳофаза қилувчи органлар ва сиёсатчилар AI учун хавфсизлик талаблари ҳамда мониторинг механизмларини ишлаб чиқишда иштирок этиши керак.

“Бу саноат учун маълум қўшимча харажатларни талаб қилади, аммо технологик ривожланишни кескин секинлаштирмайди”, дея Гейтснинг сўзларини келтиради нашрлар.

Гейтснинг огоҳлантириши AI билан боғлиқ хавфсизлик масалалари кучайган бир пайтга тўғри келмоқда. У аввалги чиқишларида ҳам сунъий интеллектдан киберҳужумлар, фирибгарлик, дезинформация ва хавфли биологик воситаларни яратишда фойдаланиш эҳтимолидан хавотир билдирган.

Шу билан бирга, Гейтснинг баёноти AI албатта миллиардлаб одамларнинг ўлимига сабаб бўлади деган прогноз эмас. У технологиянинг ёмон ниятли шахслар қўлида шундай миқёсдаги зарар етказиш имкониятига эга бўлиши мумкинлигини назарда тутган.