Қирғизистонда президентлик сайлови: айрим амалдорлар ишдан олиниши мумкин
Садир Жапаров ўтказиладиган президентлик сайловларини эркин, адолатли ва шаффоф ташкил этиш бўйича фармон имзолади.
Қирғизистон президенти Садир Жапаров 2027 йил 27 январда ўтказиладиган президентлик сайловларини эркин, адолатли ва шаффоф ташкил этиш чора-тадбирлари тўғрисидаги фармонни имзолади.
Ҳужжат давлат ва муниципал органларнинг сайлов жараёнига ноқонуний аралашуви ҳамда маъмурий ресурслардан айрим номзодлар манфаатлари йўлида фойдаланишининг олдини олишга қаратилган.
Фармонга кўра, таълим муассасалари ўқитувчилари ва талабалари, тиббиёт ва ижтимоий соҳа ходимлари, шунингдек, аҳолига хизмат кўрсатувчи бошқа давлат ва муниципал ташкилотлар ходимларини номзодларни қўллаб-қувватлашга қаратилган сайловолди ташвиқотига жалб қилиш тақиқланади.
Вазирлар Маҳкамасига сайловолди ташвиқотида ноқонуний иштирок этган ёки хизмат мавқеидан фойдаланиб номзодлардан бирининг манфаатларини кўзлаган мансабдор шахсларни интизомий жавобгарликка тортиш топширилди. Зарур ҳолларда бундай раҳбар ва ходимларни лавозимидан озод этиш чораси ҳам кўрилади.
Шунингдек, Марказий сайлов комиссиясига сайлов қонунчилигининг бир хилда қўлланилишини таъминлаш ва фуқароларни хабардор қилиш бўйича қўшимча чоралар кўриш тавсия этилган.
Фармонда Қирғизистон қонунчилигига мувофиқ халқаро кузатувчиларнинг сайлов жараёнидаги иштирокини таъминлаш ҳам назарда тутилган.
