10 йиллик қидирув: АҚШда ўзбекистонлик эркакнинг иши судда кўрилмоқда

Ўзбекистон фуқароси ва кейинчалик АҚШ фуқаролигини олган Довуд Ансорий, шунингдек, Козимжон Ғофуров номи билан танилган шахс ИШИД ва «Ан-Нусра фронти»га моддий ёрдам кўрсатишга уриниш ҳамда бу борада тил бириктиришда айбланмоқда. Унинг иши АҚШнинг Нью-Йорк Шарқий округи федерал судида кўрилмоқда.

АҚШ Адлия вазирлиги маълум қилишича, Ансорий 2026 йил 23 сентябрда Грузиядан АҚШга экстрадиция қилинган. У 2026 йил август ойида Тбилисида ҳибсга олинган.

Федерал прокуратура маълумотларига кўра, Ансорий Бруклинда фаолият юритган радикаллашган шахслар тармоғига раҳбарлик қилган. Терговчиларнинг таъкидлашича, гуруҳ Сурияга бориб, ИШИД ёки «Ан-Нусра фронти» сафида жанг қилишни режалаштирган шахсларнинг сафарини молиялаштириш учун маблағ тўплаган.

Тергов маълумотларига кўра, 2013 йилда Ансорий ва унинг шериклари камида уч кишининг Сурияга боришини молиялаштирган. АҚШ расмийлари ушбу шахсларнинг кейинчалик Сурияда ҳалок бўлганини билдирган. Шунингдек, гуруҳ Сурияга кетган шахсларнинг оилаларини қўллаб-қувватлаш учун ҳам маблағ йиғгани айтилмоқда.

Ансорий 2016 йил май ойида, гумон қилинган шерикларидан бири ҳибсга олинганидан бир неча кун ўтиб, АҚШдан чиқиб кетган. Шундан сўнг у АҚШга қайтмаган ва қарийб ўн йил давомида қидирувда бўлган.

Бруклиндаги федерал катта ҳакамлар ҳайъати унга нисбатан айблов хулосасини 2021 йил ноябрь ойида чиқарган. Унга ИШИД ва «Ан-Нусра фронти»га моддий ёрдам кўрсатиш мақсадида тил бириктириш ҳамда бундай ёрдамни амалга оширишга уриниш бўйича айбловлар қўйилган.

АҚШ расмийларининг маълум қилишича, иш бўйича терговда бир қатор федерал ва маҳаллий ҳуқуқни муҳофаза қилувчи идоралар иштирок этган. Ансорийнинг Грузиядан АҚШга экстрадиция қилинишида Грузия ва АҚШ ҳуқуқни муҳофаза қилувчи органлари ҳамкорлик қилган.

Агар судда айбловлар исботланса, Ансорий 35 йилгача озодликдан маҳрум қилиниши мумкин. Бироқ ҳозирча унга қўйилган айбловлар суд ҳукми билан тасдиқланмаган ва у қонунга кўра айби исботланмагунча айбсиз ҳисобланади.