Хитой ва АҚШ савдо божларини 30 млрд долларга камайтиришга келишди: томонлар AI бўйича мулоқот бошлайди
Келишув ХХР раисининг Вашингтонга уч кунлик ташрифи якунлари бўйича эришилган саккиз бандли консенсус доирасида тузилган.
Хитой ва АҚШ ўртасида ўзаро божларни 30 млрд долларга камайтириш ҳамда сунъий интеллект бўйича мулоқот бошлаш тўғрисида келишувга эришилди. Бу ҳақда Хитой Ташқи ишлар вазирлигига таяниб, Reuters хабар берди.
Келишув ХХР раиси Си Цзиньпиннинг Вашингтонга ташрифи давомида эришилган саккиз банддан иборат консенсус доирасида тузилган. Томонлар, шунингдек, савдо кенгашини ташкил этиш ва Куала-Лумпурдаги аввалги музокаралар натижаларини давом эттиришга келишиб олган.
Аввалроқ Хитой ва АҚШ ноябрь ойининг 10-кунида якунланиши керак бўлган савдо сулҳини яна икки ойга узайтирган эди. АҚШ Молия вазири Скотт Бессентга кўра, бу каттароқ савдо келишувини ишлаб чиқиш учун қўшимча вақт беради.
Си Цзиньпин ва АҚШ президенти Дональд Трамп ўртасидаги уч кунлик саммит жума куни якунланган. Саммитдан сўнг Си Цзиньпин Пекинга қайтган.
Хитой Ташқи ишлар вазирлиги, шунингдек, сунъий интеллект технологиялари бўйича икки давлат ўртасидаги алмашинувларни кучайтириш ва янги технологик ўзгаришлар асосида умумий келишувга эришиш зарурлигини билдирган.
Томонлар Осиё-Тинч океани иқтисодий ҳамкорлиги (APEC) етакчилари йиғилиши ҳамда G20 саммитини ўтказишда бир-бирини қўллаб-қувватлашга ҳам келишган. Ҳар икки давлат раҳбари бошқа томон мезбонлик қиладиган ушбу тадбирларда қатнашишни режалаштирмоқда.
Ташқи сиёсат масаласида томонлар Эрон ядро қуролини ишлаб чиқмаслик бўйича мажбуриятини бажариши кераклигига келишган. Шунингдек, халқаро сув йўлларида ҳеч бир давлат ёки ташкилот транзит тўловлари жорий қилмаслиги кераклиги қайд этилган.
