Қозоғистонда ҳарбийлар ўлими: 5 нафар мансабдор ушланди

Қозоғистонда «Ҳазар Қорғони — 2026» машғулотлари вақтида ҳарбий хизматчилар ҳалок бўлиши ортидан Мудофаа тизимининг 5 нафар мансабдори ушланди. Улар хизматга лоқайд муносабатда бўлиш ва кемани бошқариш қоидаларини бузишда гумон қилинмоқда.

 

Ушланганлар орасида Қуролли Кучлар Ҳарбий-денгиз кучлари Бош қўмондони штаб бошлиғи — биринчи ўринбосари, икки нафар ҳарбий қисм командири, денгиз пиёдалари ротаси ҳамда катер командирлари бор.

 

Гумонланувчиларнинг барчаси Ақтау шаҳри полиция бошқармасининг вақтинча сақлаш изоляторига жойлаштирилган.

 

24 сентябрь куни Қозоғистоннинг Манғистов вилояти соҳилида ўтказилган денгиз машғулотлари вақтида об-ҳаво кескин ёмонлашиб, кучли шамол кузатилган. Натижада 17 нафар ҳарбий хизматчи денгизга олиб чиқиб кетилган. Қидирув-қутқарув ишлари давомида уч нафар ҳарбий хизматчи қутқарилган, 14 нафари эса ҳалок бўлган.

 

Ҳозирда терговчилар ҳарбий машғулотларни ташкил этиш ва ўтказишда масъул шахслар томонидан қандай қарорлар қабул қилингани, хавфсизлик талабларига риоя этилгани, об-ҳаво шароити ҳисобга олингани, катернинг техник ҳолати ва мансабдорларнинг ҳаракатларини ўрганмоқда.

 

Ҳолат юзасидан Қозоғистон Ички ишлар вазирлигининг ҳарбий-тергов бўлинмаси томонидан тергов олиб борилмоқда. Гумонланувчиларнинг ҳаракатларига қонунчиликда белгиланган тартибда ҳуқуқий баҳо берилади.

 

Тергов Ички ишлар вазирлиги ва Бош прокуратура назоратида. Қўшимча гумонланувчиларни аниқлаш бўйича ҳам тергов ҳаракатлари давом эттирилмоқда.