Жанубий Африкадаги иккита шаҳарчада отишма бўлди: 27 киши вафот этди

Жанубий Африканинг икки шаҳарчасида содир бўлган отишмаларда камида 27 киши ҳалок бўлди, 20 дан ортиқ одам жароҳатланди. Полиция ҳодисалар юзасидан бир нечта гумондорларни қидирмоқда.

 

Биринчи отишма шанба куни кечқурун Ёҳаннесбург жануби-ғарбидаги Ведела шаҳарчасида содир бўлган. Тавернада юз берган ҳужум оқибатида камида 17 киши ҳалок бўлиб, 15 киши жароҳатланган.

 

Полиция маълумотларига кўра, қуролланган шахслар аввал Таверна ташқарисида тўпланган одамларга қарата ўқ узган, кейин бино ичига кириб, отишмани давом эттирган. Ҳужум вақтида айрим мижозларнинг мобил телефонлари ҳам олиб қўйилган.

 

Гумондорлар икки автомобилда воқеа жойидан қочган. Ҳодиса вақтида яна иккита автомобиль ёқиб юборилган. Полиция саккиз нафар гумондорни қидирмоқда. Улар АК-47 автоматлари ва тўппончалар билан қуроллангани айтилмоқда. Ҳужум сабаби ҳозирча номаълум.

 

Иккинчи отишма якшанба куни ярим тундан кейин Кейптаун яқинидаги Лвандле шаҳарчасида содир бўлган. Дўконга қуролланган шахслар ҳужум қилиши оқибатида камида 10 киши ҳалок бўлган, 11 киши яраланган. Полиция ҳодисага алоқадор бир нечта гумондорни қидирмоқда.

 

Мазкур воқеалар Дурбан шаҳри яқинидаги уйда уюштирилган зиёфатда 11 киши, жумладан, ҳомиладор аёл ҳалок бўлган отишмадан бир неча кун ўтиб содир бўлди.

 

Жанубий Африкада ўқотар қуроллар қўлланадиган зўравон жиноятлар мунтазам қайд этилади. Ҳукумат, айниқса, йирик шаҳарларда жамоат хавфсизлигини таъминлаш ва қурол ишлатиладиган жиноятларга қарши курашни кучайтириш бўйича босим остида қолмоқда.