Дунё бўйлаб гуманитар ёрдам: Европа Иттифоқи 710 млн евро ажратади

Европа Иттифоқи можаролар, табиий офатлар ва бошқа инқирозлардан жабр кўрганларга қўшимча 710 млн евро миқдорида гуманитар ёрдам ажратади.

 

Бу ҳақда Еврокомиссия раҳбари Урсула фон дер Ляен 26 сентябрь куни Нью-Йоркдаги Global Citizen Festival иштирокчиларига йўллаган видеомурожаатида маълум қилди. Фестиваль кейинчалик ноқулай об-ҳаво сабаб бекор қилинган.

 

Маблағларни тақсимлашда Африкага, шунингдек, мажбурий кўчирилган шахслар ва уларни қабул қилаётган жамоаларга алоҳида эътибор қаратилади. Хусусан, Саҳрои Кабирдан жанубдаги Африка мамлакатларида миграция билан боғлиқ чора-тадбирларга қарийб 380 млн евро йўналтирилади.

 

Яна 252 млн евро қуролли можаролар, аҳолининг мажбурий кўчирилиши, эпидемиялар ва табиий офатлар оқибатларига қарши шошилинч ёрдам кўрсатишга сарфланади. Ушбу маблағнинг 97 млн евроси Саҳрои Кабирдан жанубдаги Африка мамлакатларига, 103 млн евроси Фаластин ҳудудлари ва Ливанга, 52 млн евроси эса Украинага, жумладан, қишга тайёргарлик кўриш учун йўналтирилади.

 

2026 йилда EИ дунё бўйлаб гуманитар ёрдам учун қарийб 1,9 млрд евро ажратишни режалаштирган. Шундан 557 млн евроси Саҳрои Кабирдан жанубдаги Африка мамлакатларига, 463 млн евроси Яқин Шарқ ва Шимолий Африкага мўлжалланган.

 

Украина ва Молдовага йўналтириладиган гуманитар ёрдам ҳажми эса йил давомида 248 млн еврогача оширилган. Ушбу маблағлар озиқ-овқат, тиббий ёрдам, уй-жойларни тиклаш, пул тўловлари ва қишга тайёргарлик кўришга йўналтирилади.

 

Еврокомиссия маълумотларига кўра, Россия Украинага қарши кенг кўламли уруш бошлаганидан бери EИ Украинадаги гуманитар ёрдам дастурларига 1,4 млрд евродан ортиқ маблағ ажратган.