5 йилгача қамоқ: рухсатномасиз “дом” қуришга жазо кучайтирилди
Қуришни бошлашдан олдин тегишли ҳудудий инспекциядан рухсатнома олиш талаб этилади.
Қурилиш соҳасида давлат назорати ва бошқарувини такомиллаштиришга қаратилган қонун билан тегишли қонунчилик ҳужжатларига ўзгартириш ва қўшимчалар киритилди.
Унга кўра, қурилиш-монтаж ишларини бошлаш учун қурилиш ва уй-жой коммунал хўжалиги соҳасида назорат қилиш ҳудудий инспекцияларидан рухсатнома олиш талаб этилади.
Жиноят кодексига киритилган ўзгартиришларга кўра, кўп квартирали уйларни тегишли инспекциянинг рухсатисиз қуриш учун жиноий жавобгарлик белгиланмоқда.
Хусусан, бундай ҳаракат маъмурий жазо қўлланилганидан кейин яна содир этилса, 3 йилдан 5 йилгача озодликдан маҳрум қилиш билан жазоланиши мумкин.
Шунингдек, шаҳарсозлик тўғрисидаги қонунчиликни бузиш оқибатида одам ўлса ёки бошқа оғир оқибатлар юзага келса, 5 йилдан 7 йилгача озодликдан маҳрум қилиш жазоси белгиланди.
Қонун 2026 йил 28 сентябрда қабул қилинган бўлиб, расмий эълон қилинган кундан уч ой ўтиб кучга киради.
