14 ёшга тўлмаган болаларга жинсий тажовуз учун умрбод қамоқ: Қонунчилик палатасида таклиф кўриб чиқилмоқда
Вояга етмаганларга нисбатан жинсий жиноятлар бўйича жавобгарликни кучайтириш, жабрланган болаларни тергов ва суд жараёнларида ҳимоя қилиш ҳамда давлат ҳисобидан юридик ёрдам кўрсатиш таклиф этилмоқда.
Олий Мажлис Қонунчилик палатасида болаларнинг ҳуқуқларини ҳимоя қилишни кучайтиришга қаратилган қонун лойиҳаси кўриб чиқилмоқда. Ҳужжат билан вояга етмаганларга, хусусан, 14 ёшга тўлмаган болаларга нисбатан жинсий жиноятлар учун жавобгарликни кучайтириш таклиф этилмоқда.
Қонун лойиҳасига кўра, 14 ёшга тўлмаган шахсни зўрлаш ёки унга нисбатан бошқа оғир жинсий жиноятларни содир этган шахсларга узоқ муддатли ёки умрбод озодликдан маҳрум қилиш жазоси тайинланиши мумкин.
Шунингдек, бундай жиноятларни содир этган шахсларни жавобгарликка ва жазога тортишда муддат ўтганлиги қўлланмаслиги таклиф этилмоқда. Яъни, боланинг жинсий эркинлигига қарши жиноят содир этган шахс жавобгарликка тортиш ёки жазони ижро этиш муддати ўтганлиги сабабли жавобгарликдан ёки жазодан озод қилинмаслиги кўзда тутилмоқда.
Лойиҳа билан Жиноят, Жиноят-процессуал ва Маъмурий жавобгарлик тўғрисидаги кодекслар ҳамда қатор бошқа қонун ҳужжатларига тегишли ўзгартириш ва қўшимчалар киритиш назарда тутилган.
Ҳужжатда фақат жазо чораларини кучайтириш билан чекланиб қолмасдан, зўравонликдан жабрланган болаларнинг ҳуқуқларини тергов ва суд жараёнларида ҳимоя қилишга қаратилган нормалар ҳам белгиланиши таклиф этилмоқда.
Жумладан, зўравонликдан жабрланган вояга етмаганларни сўроқ қилиш жараёнини видеоёзув орқали қайд этиш, жинсий эркинликка қарши жиноятлар бўйича жабрланган бола билан гумон қилинувчи, айбланувчи ёки судланувчини юзлаштиришни махсус тартибда ўтказиш таклиф қилинмоқда.
Болага яқин шахслар томонидан зўравонлик содир этилган ҳолатларда эса жиноят ишини судга қадар юритиш ва суд муҳокамаси жараёнларида васийлик ва ҳомийлик органи вакилининг иштирокини таъминлаш назарда тутилмоқда.
Бундан ташқари, зўравонликдан жабрланган ёки унга гувоҳ бўлган болаларга давлат ҳисобидан юридик ёрдам кўрсатиш механизмини жорий этиш таклиф қилинмоқда. Бу болаларнинг ҳуқуқ ва қонуний манфаатларини ҳимоя қилиш учун малакали юридик ёрдамдан фойдаланиш имкониятини кенгайтиришга қаратилган.
