22 нафар ўқувчи заҳарланди: мактаб ёнидаги пахта даласига дори сепилган

23 сентябрь куни соат 11:45 атрофида Қашқадарё вилояти Ғузор туманидаги 51-сонли умумий ўрта таълим мактабининг ўқувчилари кўнгил айниши ва бош оғриғи каби аломатлар билан туман тиббиёт бирлашмасига олиб келинган.

Ички ишлар вазирлиги маълумотига кўра, дастлаб 21 нафар ўқувчи тиббиёт муассасасига мурожаат қилган. Ўрганишлар давомида мактаб жойлашган «Янгиобод» маҳалласига туташ ҳудудда “Шоҳмалик Шермурод ўғли” фермер хўжалигига тегишли жами 88 гектар ер майдони мавжудлиги, шундан 20 гектари мактаб атрофида жойлашгани аниқланган. Ушбу майдонларга пахта экилган.

Дастлабки маълумотларга кўра, 23 сентябрь куни соат 09:00 ларда фермер хўжалиги томонидан пахтанинг эрта етилишини таъминлаш мақсадида “Агро Аугрон” номли дори воситаси сепилган. Шундан сўнг 10–11-синфда таҳсил олаётган ўқувчиларда заҳарланиш аломатлари кузатилган.

Тиббиёт муассасасига олиб келинган ўқувчиларга дастлаб “ошқозон диспепция синдроми” ташхиси қўйилган. Ҳозирда 7 нафар ўқувчи Ғузор туман тиббиёт бирлашмасида стационар даволанмоқда. Соғлиғи яхшилангани сабабли қолган 15 нафар ўқувчи яшаш манзилига жавоб берилган.

Ҳолат юзасидан Жиноят кодексининг 201-моддаси 1-қисми билан жиноят иши қўзғатилган. Воқеа сабабларига ҳуқуқий баҳо бериш учун тегишли экспертизалар тайинланган.

Айни пайтда Қашқадарё вилояти ИИБ Тергов бошқармаси томонидан дастлабки тергов ҳаракатлари олиб борилмоқда.