Ботаника боғидаги дарахтлар кесиляптими? Фанлар академияси изоҳ берди

 

Ижтимоий тармоқларда Тошкент Ботаника боғида дарахтларни кесиш ва қазиш ишлари олиб борилаётгани ҳақидаги хабарлар тарқалди. Фанлар академияси Ахборот хизмати мазкур ҳолат юзасидан расмий муносабат билдирди.

 

Маълум қилинишича, ҳозирда Тошкент Ботаника боғининг буфер зонасидаги 50 сотих майдонда сув ҳавзаси ташкил этиш ишлари олиб борилмоқда.

 

Фанлар академиясининг қайд этишича, мазкур ҳудуд Ботаника боғининг илмий коллекция майдонларига кирмайди. Ушбу жойда асосан табиий равишда ўсиб чиққан маймунжон, қамиш ва бошқа ёввойи ўсимликлар мавжуд.

 

Сув ҳавзаси ташкил этилаётган ҳудудда Ботаника боғининг илмий коллекциясига мансуб дарахт ва буталар мавжуд эмас.

 

Ишлар экология мутахассислари билан ҳамкорликда олиб борилмоқда. Ҳудуддаги ишларнинг экологик талабларга мувофиқ ташкил этилиши ҳамда мавжуд яшил ҳудудларга зарар етказилмаслиги назорат қилинмоқда.

 

Расмий муносабатга кўра, сув ҳавзасини ташкил этишдан асосий мақсад Ботаника боғида сув ўтлари, сув бўйида ўсувчи дарахт ва буталар экотизимини яратиш, уни илмий жиҳатдан тадқиқ қилиш ҳамда тегишли тавсиялар ишлаб чиқишдан иборат.

 

Бундан ташқари, мазкур сув ҳавзаси илмий вазифалардан ташқари, ҳудуддаги микроиқлим барқарорлигини таъминлашга ҳам хизмат қилиши кутилмоқда.

 

Фанлар академияси оммавий ахборот воситалари ва ижтимоий тармоқ фойдаланувчиларидан фақат ишончли ҳамда расмий манбаларга таянган ҳолда хулоса чиқариш, тасдиқланмаган маълумотларни тарқатмасликни сўради.