Сохта ҳужжатлар орқали кредит олиш: 5 киши ушланди
Улар ҳужжатларда ўзларини Миллий гвардияга қарашли ҳарбий қисм хизматчилари сифатида кўрсатган.
Бош прокуратура ҳузуридаги Департаментнинг Қува туман бўлими томонидан тадбиркорлик субъектларининг ҳуқуқларини ҳимоя қилиш юзасидан ўтказилган терговга қадар текширувда мазкур ҳолат фош этилган.
Аниқланишича, 5 нафар фуқаро ўзаро тил бириктириб, ҳеч қаерда расман ишламаган бўлсада, гўёки Миллий гвардияга қарашли ҳарбий қисм хизматчилари сифатида кўрсатилган сохта меҳнат шартномалари ва иш ҳақи олганликлари тўғрисидаги маълумотномаларни тайёрлаган.
Улар ушбу ҳужжатларни тижорат банкининг Қува туман филиалига тақдим этиб, сохта маълумотлар асосида жами 428,8 млн сўм кредит маблағларини олган.
Мазкур ҳолат юзасидан Жиноят кодексининг 168-моддаси (фирибгарлик) ҳамда 228-моддаси (ҳужжатлар, штамплар, муҳрлар, бланкаларни тайёрлаш, қалбакилаштириш, сотиш ёки улардан фойдаланиш) билан жиноят иши қўзғатилган.
Ҳозирда тергов ҳаракатлари олиб борилмоқда.
