Ўзбекистонда октябрь ойида об-ҳаво қандай бўлади? «Ўзгидромет» маълумот берди
Ўзгидромет октябрь ойида ҳаво ҳарорати ўзгариб туриши, айрим ҳудудларда ёғингарчилик меъёрдан кўп бўлишини маълум қилди.
Ўзбекистонда октябрь ойида ҳаво ҳарорати ўзгарувчан бўлиши кутилмоқда. Ойнинг айрим кунларида илиқ об-ҳаво кузатилса, вақти-вақти билан совуқ ва нам ҳаво оқимлари кириб келиши мумкин. Бу ҳақда «Ўзгидромет» маълумот берди.
Одатдоктябрдада ўртача ойлик ҳаво ҳарорати сентябрга нисбатан 6–7 даражага, республиканинг шимолий ҳудудларида эса 8–9 даражага паст бўлади. Кечалари ҳаво ҳарорати 12–17 даража илиқдан 2–7 даража илиққача, кундуз кунлари эса 23–28 даража илиқдан 10–15 даража илиққача ўзгаради. Октябрь ойининг иккинчи ярмида, шимолий ҳудудларда эса эртароқ дастлабки кузги совуқлар кузатилиши мумкин.
«Ўзгидромет» прогнозига кўра, октабр ойи беқарор об-ҳаво билан бошланади. 1-октабр куни марказий ва шарқий вилоятларда нам ва нисбатан салқин ҳаво оқимининг таъсири давом этади. Айрим жойларда ёмғир ёғиши, тоғолди ва тоғли ҳудудларда эса ёғингарчилик кучлироқ бўлиши мумкин. Баланд тоғларда ёмғир қорга айланиши эҳтимоли бор.
2–4 октябрь кунлари республиканинг катта қисмида ёғингарчилик кутилмайди ва ҳаво ҳарорати кўтарила бошлайди.4 октябрдан шимоли-ғарбий ҳудудларга янги совуқ ва нам ҳаво оқими кириб келиши, 5–7 октябрь кунлари эса унинг республиканинг бошқа ҳудудларига тарқалиши кутилмоқда.
Ойнинг қолган қисмида ҳам ҳаво ҳароратининг ўзгариб туриши прогноз қилинмоқда. Илиқ кунларда кечаси ҳаво 10–13 даража, кундузи 25–28 даражагача исиши мумкин. Совуқ ҳаво оқимлари кириб келганда эса кечаси 3–8 даража, кундузи 15–20 даражагача пасаяди. Шимолий ҳудудларда бундай даврларда кечаси 0–2 даража совуқ, кундузи 10–15 даража илиқ бўлиши мумкин.
«Ўзгидромет» октябрь ойининг ўртача ҳарорат фони иқлимий меъёр атрофида, айрим ҳудудларда эса ундан юқори бўлишини кутмоқда. Ёғингарчилик ҳудудлар бўйича нотекис тақсимланиши мумкин. Шимолда ёғингарчилик миқдори меъёрдан кам, марказий ва жануби-шарқий ҳудудларда эса меъёр атрофида бўлиши прогноз қилинмоқда.
Тошкент, Самарқанд, Жиззах, Сирдарё, Қашқадарё ва Сурхондарё вилоятларида, шунингдек, Фарғона водийсининг айрим туманларида ёғингарчилик миқдори иқлимий меъёрдан кўп бўлиши эҳтимоли бор.
