Тошкентда Бўрижар кўчаси қайта номланди: энди у Пекин кўчаси
Тегишли қарор халқ депутатлари Тошкент шаҳар Кенгаши томонидан қабул қилинди.
Тошкент шаҳри Яккасарой туманининг Ракатбоши маҳалласидаги Бўрижар кўчаси Пекин кўчаси деб қайта номланди. Бу ҳақда халқ депутатлари Тошкент шаҳар Кенгашининг 25 сентябрдаги қарорида белгиланган.
Қарорга кўра, Бўрижар кўчасини Пекин кўчаси деб қайта номлаш бўйича Яккасарой тумани ҳокимлигининг таклифи маъқулланган. Мазкур масала Тошкент шаҳар Географик объектларни номлаш ва қайта номлаш масалалари бўйича комиссиянинг 29 июндаги йиғилишида ҳам кўриб чиқилган.
Кўча номи ўзгариши муносабати билан ундаги кўчмас мулк объектларининг манзиллари ҳам янгиланади. Давлат кадастрлари палатасининг Тошкент шаҳар бошқармасига ушбу ишларни икки ой ичида якунлаш ҳамда манзили ўзгарган шахсларни хабардор қилиш топширилган.
Шунингдек, шаҳар Ободонлаштириш бош бошқармаси уч ой ичида кўчадаги кўрсаткич ва пешлавҳаларни янги номга мослаштириши керак.
Яккасарой тумани ҳокимлиги ва бошқа масъул ташкилотларга тегишли ҳужжатларга ўзгартириш киритиш ҳамда аҳоли ўртасида кўчанинг янги номи бўйича тушунтириш ишларини олиб бориш вазифаси юклатилган.
Қарор расман эълон қилинган кундан кучга кирган.
