Болаларга зўравонлик: жавобгарликни кучайтирувчи қонун лойиҳаси Қонунчилик палатасига киритилди
Ҳужжат 29 сентябрь куни депутатлар муҳокамасига қўйилади.
«Адолат» СДП фракцияси ташаббуси билан болаларни зўравонликнинг барча шаклларидан ҳимоя қилиш тизимини такомиллаштиришга қаратилган қонун лойиҳаси ишлаб чиқилиб, Қонунчилик палатасига киритилди.
Мазкур қонун лойиҳаси билан Жиноят, Жиноят-процессуал кодекслари, Маъмурий жавобгарлик тўғрисидаги кодекс ҳамда қатор қонун ҳужжатларига болаларга нисбатан зўравонлик ҳолатлари учун жавобгарлик чораларини кескин кучайтиришга қаратилган тегишли ўзгартириш ва қўшимчалар киритиш кўзда тутилган.
Олий Мажлис Қонунчилик палатаси Кенгашининг йиғилишида лойиҳа навбатдаги ялпи мажлис кун тартибига киритилиши бўйича қарор қабул қилинган. Уни кўриб чиқиш учун Демократик институтлар ва фуқаролик жамиятини ривожлантириш масалалари қўмитаси масъул этиб белгиланган.
Қонун лойиҳаси 29 сентябрь куни Қонунчилик палатасининг навбатдаги мажлисида кўриб чиқилиши режалаштирилган.
