Билл Гейтс AI ҳақидаги хавотирларини ўзгартирди — Трамп

 

АҚШ президенти Дональд Трамп Microsoft асосчиси Билл Гейтснинг сунъий интеллектнинг эҳтимолий хавфлари ҳақидаги қарашлари ўзгарганини маълум қилди.

 

Трамп бу ҳақда Оқ уйда йирик технологик компаниялар раҳбарлари билан учрашувдан сўнг гапирди. Унинг айтишича, Гейтс энди сунъий интеллект бир миллиард одамнинг ўлимига олиб келиши мумкин, деган фикрни илгари сурмаяпти.

 

“У энди бундай демаяпти. Якшанба куни нима дегани менга аҳамиятсиз, чунки кеча у умуман бундай демади. Аслида, у бунинг аксини айтди”, — деган Трамп.

 

Президент Гейтснинг сунъий интеллект бўйича хавотирларини глобал исиш ҳақидаги хавотирларга ўхшатди.

 

Билл Гейтс 27 сентябрь куни NBC телеканалининг “Meet the Press” дастурида сунъий интеллектни назорат қилиш масаласида ҳукумат ва қонунчилар фаолроқ иштирок этиши кераклигини айтган. У хавфсизлик чораларини фақат компанияларнинг ўзини ўзи тартибга солишига қолдириш етарли эмаслигини таъкидлаган.

 

Гейтс аввалги чиқишларида ҳам AI’нинг назоратсиз ривожланиши жиддий хавфларга олиб келиши мумкинлигидан огоҳлантирган. Reuters хабарига кўра, у сиёсатчилар, ҳуқуқни муҳофаза қилувчи органлар ва технология компаниялари хавфсизлик механизмларини ишлаб чиқишда биргаликда иштирок этиши кераклигини билдирган.

 

Сунъий интеллектни ривожлантириш ва уни тартибга солиш бўйича баҳслар сўнгги кунларда АҚШда кучайди. Anthropic, OpenAI ва бошқа компаниялар вакиллари AI хавфсизлиги масаласида эҳтиёткорликни кучайтиришга чақирayotgan бир пайтда, Трамп технологик тараққиётни секинлаштиришга қарши эканини билдирган.

 

29 сентябрь куни Трамп йирик технологик компаниялар раҳбарлари билан учрашиб, AI хавфсизлиги бўйича ихтиёрий келишувни ҳам эълон қилган.