АҚШ Ироқдаги 12 йиллик операцияни тугатди: коалиция кучлари Эрбилдан олиб чиқилди
Хавфсизликни таъминлаш бўйича асосий масъулият эса Ироқ томонига ўтди.
АҚШ ва коалиция ҳамкорлари Ироқда ИШИДга қарши олиб борилган «Inherent Resolve» операциясини расман якунлади. Бу ҳақда Пентагон бош матбуот котиби Шон Парнелл маълум қилди.
Унинг сўзларига кўра, коалиция кучлари ва ҳарбий техникасининг Эрбил авиабазасидан тартибли равишда олиб чиқилиши Ироқда ИШИДни мағлуб этишга қаратилган ҳарбий миссиянинг якунланганини англатади.
Пентагон АҚШ бошчилигидаги кампания қарийб 12 йил давом этгани ва натижада ИШИД Ироқ ҳамда минтақада уюшган ҳарбий таҳдид сифатида мағлуб этилганини билдирди.
Эндиликда хавфсизликни таъминлаш бўйича асосий вазифа Ироқ хавфсизлик кучлари, жумладан, Пешмерга ва Ироқ Курдистонидаги бошқа кучлар зиммасига ўтади. АҚШ эса Ироқ томонига мақсадли ҳарбий тайёргарлик ва разведка ёрдамини давом эттиради.
Пентагон маълумотига кўра, ИШИД қолдиқлари ҳамда Ироқ суверенитети ва минтақавий барқарорликка таҳдид солаётган Эрон билан иттифоқдош қуролли гуруҳларга қарши кураш бўйича асосий масъулият энди Ироқ ҳукуматига юкланади.
Шу билан бирга, АҚШ Ироқ билан терроризмга қарши кураш соҳасидаги ҳамкорликни давом эттиришини маълум қилди. Вашингтон ИШИДнинг Ироқ ҳудудида қайта тикланишига йўл қўймаслик учун Бағдод ва бошқа ҳамкорлар билан ишлашда давом этади.
Пентагон вакили АҚШ кучли ва суверен Ироқни қўллаб-қувватлашини, бу эса икки давлат ўртасидаги савдо-иқтисодий, дипломатик ва хавфсизлик соҳаларидаги ҳамкорликни янада ривожлантириш учун асос бўлишини таъкидлади.
