9 нафар тинч аҳоли ҳалок бўлди: Покистон Афғонистонга ҳаво зарбалари берди
Покистон “террорчилар лагерлари ва бошпаналари”га зарба берилганини таъкидлади.
Ислом Амирлиги вакили Забиҳуллоҳ Мужоҳид эса Покистон кучлари Кунар ва Ҳелманд вилоятларидаги аҳоли яшайдиган ҳудудларга зарба берганини билдирган.
Унинг айтишича, ҳужумлар оқибатида 9 нафар тинч аҳоли, жумладан, аёллар ва болалар ҳалок бўлган, яна 11 киши яраланган. Шунингдек, учта турар жой биноси вайрон қилингани айтилган.
Маҳаллий аҳоли ҳам ҳаво зарбалари айрим турар жойларга текканини билдирган. Афғонистон томони бу ҳужумларни мамлакат суверенитетига тажовуз сифатида баҳолаган.
Бироқ, Покистон Ахборот вазирлиги баёнотига кўра, зарбалар Афғонистон ҳудудидаги “террорчилар лагерлари ва бошпаналари”га қаратилганини таъкидламоқда. Вазирлик ҳужумлар натижасида 22 нафар жангари ўлдирилгани, шунингдек, қурол-яроғ ва ўқ-дорилар сақланган жойлар йўқ қилинганини маълум қилган.
БМТнинг Афғонистондаги ёрдам миссияси эса кейинчалик камида 10 нафар тинч фуқаро, уларнинг аксарияти болалар, ҳалок бўлганини қайд этган.
Ҳаво зарбалари Покистон ва Афғонистон ўртасидаги сўнгги ойлар давомида кучайиб бораётган таранглик фонида юз берди. Исломобод Афғонистон ҳудудида Покистон ичидаги ҳужумларни уюштираётган жангари гуруҳлар яширинганини даъво қилмоқда. Кобул эса бу айбловларни рад этиб келади.
БМТ маълумотларига кўра, 2026 йил давомида чегарадаги қуролли зўравонликлар оқибатида Афғонистонда 1 100 дан ортиқ тинч фуқаро ҳалок бўлган ёки жароҳатланган
