Тошкентда 100 та ҳожатхона ташкил этилади: лойиҳага 140,4 млн сўм ажратилиши мумкин
Санитария-гигиена шохобчалари соддалаштирилган тартибда давлат-хусусий шериклик асосида ташкил этилади.
2026 йилда Тошкент шаҳрининг марказий ва туристик кўчалари, хиёбонлар ҳамда аҳоли ва сайёҳлар ташриф буюрадиган объектлар атрофида 100 та санитария-гигиена шохобчаси (ҳожатхона) ташкил этилади.
Бу Тошкент шаҳри ҳокими Шавкат Умурзаковнинг тегишли қарорида белгиланган. Шохобчалар соддалаштирилган тартибда давлат-хусусий шериклик асосида ташкил этилади.
Қарорга кўра, ҳожатхоналарни жойлаштириш учун зарур топографик ишларни амалга ошириш харажатларига 140,4 млн сўм ажратиш бўйича «Тошкент Инвест компанияси» АЖ кузатув кенгашига таклиф киритилади.
Маблағни Тошкент шаҳри ҳокимлиги ҳузуридаги Тошкент шаҳрини ривожлантириш жамғармаси ҳисобидан «Қурилишда муҳандислик қидирувлари, геоахборот, шаҳарсозлик кадастри лойиҳа илмий-тадқиқот институти» МЧЖга ажратиш кўзда тутилган.
Ажратилган маблағларнинг мақсадли сарфланишини «Тошкент Инвест компанияси» АЖ таъминлайди. Тошкент шаҳри Ғазначилик хизмати бошқармаси эса маблағларни белгиланган тартибда молиялаштириш чораларини кўради.
