“Саккизта урушни тугатдим, яна бири яқин” — Трамп
АҚШ президенти орада яна бир қуролли можарога чек қўйишни кутаётганини айтди.
Трамп 7 октябрь куни Оқ уйда журналистлар билан суҳбатда саккизта урушни тугатганини даъво қилиб, “яна бири келаётганини” маълум қилган. Бироқ у қайси можаро тўққизинчи бўлишини аниқ айтмаган.
АҚШ президенти Нобель тинчлик мукофоти ҳақида ҳам гапириб, мукофотни олган ёки олмаганидан қатъи назар, аввалги лауреатлардан кўра кўпроқ иш қилганини таъкидлаган.
Трамп Норвегия Нобель қўмитаси унга мукофот бермаса, бу қўмита учун обрўга путур етказишини айтган. У, шунингдек, 2009 йилда Нобель тинчлик мукофотига сазовор бўлган собиқ президент Барак Обамани танқид қилган. Трамп Обама мукофотни президентлигининг бошида олганини ва нима сабабдан унга берилганини ўзи ҳам билмаганини даъво қилган.
АҚШ президенти аввал ҳам Украинадаги урушни тез орада якунлашга умид билдирган. Бироқ 7 октябрдаги баёнотида у “яна бир уруш” ҳақида гапирган бўлса-да, айнан қайси можаро назарда тутилаётганига аниқлик киритмаган.
