“Умра”га юбориш эвазига 1 100 доллар: Фарғонада турфирма ходими ушланди
У тегишли лицензиясиз 4 нафар фуқарони зиёратга юбориш учун 4 400 доллар талаб қилган.
Фарғона вилоятида тегишли лицензияга эга бўлмаган ҳолда «Умра» зиёратини ташкил этишга уринган турфирма ходими ушланди.
Давлат хавфсизлик хизматининг Фарғона вилояти бўйича бошқармаси ходимлари вилоят Ички ишлар бошқармаси билан ҳамкорликда тезкор тадбир ўтказди.
Тадбир давомида Данғара туманида фаолият юритувчи турфирма ходими тегишли лицензияга эга бўлмаса-да, 4 нафар фуқарони «Умра» зиёратига юборишни ташкил этишга урингани аниқланган.
У бунинг эвазига фуқаролардан жами 4 400 АҚШ доллари талаб қилган. Шахс 1 100 АҚШ долларини олган вақтида ашёвий далиллар билан ушланган.
Маълум қилинишича, айрим сайёҳлик фирмаларининг белгиланган тартиб-қоидаларга риоя қилмаган ҳолда «Умра» сафарларини ташкил этиши фуқароларнинг хорижда турли қийинчиликларга дуч келишига сабаб бўлиши мумкин.
Мазкур ҳолат юзасидан турфирма ходимига нисбатан жиноят иши қўзғатилган. Ҳозирда тергов ҳаракатлари олиб борилмоқда.
