Тошкент метросида 10 минг доллар топилди: пул эгасига қайтарилди
Пул эгаси машина олиш учун келган Қозоғистон фуқароси эканлиги аниқланган.
ИИВ Транспорт ва туризм объектларида хавфсизликни таъминлаш департаменти маълумотига кўра, Қозоғистон фуқароси автомобиль харид қилиш мақсадида Сергелига кетаётганида унинг сумкасидан 10 минг АҚШ доллари бўлган пакет тушиб қолган. Фуқаро пуллари йўқолганини автомобиль бозорига етиб боргач билган.
Шу вақтда метро ҳудудида хизмат вазифасини бажараётган Метрополитенда хавфсизликни таъминлаш бошқармаси ходими пул маблағларини топиб олган.
Ўтказилган зарур текширув ва аниқлаш ишлари, жумладан, Фасе ИД орқали олиб борилган қидирув натижасида маблағнинг қонуний эгаси аниқланган.
10 минг АҚШ доллари белгиланган тартибда тўлиқ эгасига қайтариб берилган.
Қозоғистон фуқароси ички ишлар органлари ва метро ходимларига миннатдорлик билдириб, пулларини топиб, ўзига қайтаришда кўрсатилган тезкор ёрдам учун раҳмат айтган.
