Краматорскда автобусларга зарба берилди: 33 киши ҳалок бўлди
Ҳужумдан сўнг Краматорск ва Словянск шаҳарларида жамоат транспорти ҳаракати тўхтатилди.
Украинанинг Донецк вилоятидаги Краматорск шаҳрида йўловчи автобусларига Россия томонидан берилган зарба оқибатида камида 33 нафар тинч аҳоли ҳалок бўлди, 18 киши яраланди. Ҳужумдан сўнг Краматорск ва Словянск шаҳарларида жамоат транспорти фаолияти тўхтатилди. Бу ҳақда Донецк вилояти ҳарбий маъмурияти раҳбари Вадим Филашкинга таяниб РБК Украина хабар берди.
Унинг айтишича, Россиянинг Краматорскдаги йўловчи автобусларига берган зарбаси оқибатида иккита автобус ва очиқ ҳудудда ёнғин юзага келган. Қутқарувчилар жабрланганларга ёрдам кўрсатиб, ёнғинни бартараф этган.
Хавфсизлик вазияти кескин ёмонлашгани сабабли Филашкин Краматорск ва Словянск шаҳар ҳарбий маъмуриятларига жамоат транспорти фаолиятини тўхтатиш ҳақида топшириқ берган.
Филашкиннинг таъкидлашича, Россия кучлари тинч аҳолига атайлаб зарба бермоқда. Унинг сўзларига кўра, йўловчилар бўлган автобуслар бир зарба билан кўпроқ одамни ўлдириш имконини берадиган нишонга айланган.
«Бундай шароитда йўловчилар ва ҳайдовчилар ҳаётини хавф остига қўйишга ҳаққимиз йўқ. Ҳозир Краматорск ва Словянск аҳолиси хавфсизлиги ҳамма нарсадан устун», — деди у.
Шунингдек, Краматорск жамоасига қарашли Биленке шаҳарчасида Россия ҳужуми оқибатида уч киши ҳалок бўлган. Ҳалок бўлганлардан бирининг жасади қутқарувчилар томонидан хусусий уй вайроналари остида қолган жойидан олиб чиқилган.
RBK-Украина маълумотига кўра, 22 сентябрь куни кечқурун Россия кучлари Донецк вилоятидаги Краматорскнинг турар жой ҳудудига авиабомба ташлаган. Ҳужум оқибатида ибодатхона ва кўп қаватли уйлар зарар кўрган. Бундан аввал шаҳардаги эвакуация пунктига ҳам авиабомба билан зарба берилган.
13 сентябрь куни эса Россия авиацияси Краматорскка тўртта авиабомба ташлаган. Ўшанда ҳужум оқибатида олти киши жароҳатланган.
