“Док-1 Макс” иши: жабрланувчиларга 16,7 млрд сўм товон пули тўланди
Ҳозирда қолган 61,3 млрд сўм зарарни ундириш юзасидан мажбурий ижро ҳаракатлари давом этмоқда.
“Док-1 Макс” дори воситасидан жабрланганларга компенсация маблағлари тўланмаётгани ҳақидаги хабарлар юзасидан Мажбурий ижро бюроси изоҳ берди.
МИБ маълумотига кўра, судларнинг ижро ҳужжатлари асосида қарздор С. Кариев ва бошқалардан 85 нафар фуқаро фойдасига жами 78 млрд сўм зарар ундириш бўйича ижро ишлари мавжуд.
Ижро ҳаракатлари доирасида С. Кариевга тегишли Чилонзор туманидаги 1-Қатортол маҳалласи, Қатортол 3-тор кўчасида жойлашган турар жой бинолари ҳамда Бешёғоч маҳалласи, Фурқат кўчасидаги нотурар жой биноси хатланиб, онлайн-аукцион савдоларига чиқарилган.
Фурқат кўчасидаги нотурар жой биноси аукционда сотилган ва ундан 793 млн сўм маблағ келиб тушган. Қиймати 7,1 млрд сўмга баҳоланган Қатортол 3-тор кўчасидаги турар жой бинолари бўйича аукцион савдолари эса давом этмоқда.
Аукцион савдоларидан тушган маблағлар ҳамда С. Кариевнинг оила аъзолари томонидан тўланган пуллар ҳисобидан ундирувчиларга жами 16,7 млрд сўм тенг тақсимлаб берилган.
Ҳозирда С. Кариев ва бошқалардан қолган 61,3 млрд сўм зарарни ундириш билан боғлиқ ижро ишлари бўйича мажбурий ижро ҳаракатлари давом эттирилмоқда.
Эслатиб ўтамиз, расмий маълумотларга кўра, “Док-1 Макс” дори воситасини истеъмол қилиш Ўзбекистонда 68 нафар боланинг вафот этиши ва 16 нафар боланинг ногирон бўлиб қолишига сабаб бўлган.
