1,2 кг дан ортиқ наркотик моддалар: Тошкентда интернет наркодўкони «закладчик»и ушланди
Йигит муқаддам ўғирлик билан боғлиқ жиноят учун судланган.
Давлат хавфсизлик хизматининг Тошкент шаҳар бўйича бошқармаси ходимлари Тошкент шаҳар ИИББ билан ҳамкорликда ўтказган тезкор тадбирда синтетик наркотик моддалар савдоси билан боғлиқ ҳолатни аниқлади.
Юнусобод туманидаги “Уч қаҳрамон” ЙПХ масканида пойтахтга кириб келаётган «Spark» русумли автомобиль тўхтатилиб, текширилган. Натижада, автомобилда йўловчи сифатида кетаётган, 2004 йилда Сурхондарё вилоятида туғилган шахсга тегишли целлофан пакет ичидан 200 та зип-пакетга қадоқланган 365 грамм «Мефедрон» синтетик наркотик моддаси топилган.
Тезкор тадбир давом эттирилиб, мазкур шахс вақтинча истиқомат қилаётган Тошкент туманидаги хонадон ҳам кўздан кечирилган. У ердан яна 734 грамм «Мефедрон», 63 грамм «Альфа-ПВП», 45 грамм «Спайс», иккита электрон тарози, зип-пакетлар ва бошқа ашёлар процессуал тартибда расмийлаштириб олинган.
Шу тариқа, жами 1 кг 207 грамм синтетик наркотик моддалар аниқланган.
Аниқланишича, муқаддам ўғирлик билан боғлиқ жиноят учун судланган мазкур шахс интернет наркодўконида «закладчик» сифатида фаолият юритган.
Ҳолат юзасидан унга нисбатан жиноят иши қўзғатилиб, тергов ҳаракатлари олиб борилмоқда.
