Ҳусийлар ҳужуми Саудия Арабистонини хавотирга солди: қироллик Покистондан ёрдам сўради
Қироллик зенит-ракета захиралари етишмовчилиги туфайли мавжуд тизимларни қайта тақсимламоқда.
Саудия Арабистони Ямандаги ҳусий исёнчиларининг ҳужумлари кучайиб бораётгани сабабли Покистондан ҳаво ҳужумидан мудофаа бўйича ёрдам сўради. Бу ҳақда The Wall Street Journal нашри манбаларга таяниб хабар берди.
Нашр маълумотларига кўра, қироллик кейинги ҳужумларни қайтариш учун зарур бўлган тутиб қолувчи ракеталар етишмовчилигига дуч келмоқда. Шу сабабли Саудия Арабистони мавжуд ҳаво мудофааси батареяларини қироллик саройлари ва энергетика инфратузилмаси ўртасида қайта тақсимлашга мажбур бўлган.
Ар-Риёд ҳарбий иттифоқчиси Покистондан ёрдам сўраш билан бирга, дунё бўйлаб ҳаво мудофааси тизимларини изламоқда. Шунингдек, Саудия Арабистони Ямандаги иттифоқчиларини қўллаб-қувватлаш учун хорижий жангчиларни ёллаш имкониятини ҳам кўриб чиқмоқда.
WSJ қайд этишича, валиаҳд шаҳзода Муҳаммад бин Салмоннинг АҚШ билан яқин алоқаларни мустаҳкамлаш ва мамлакатга катта миқдорда инвестиция киритиш бўйича саъй-ҳаракатларига қарамай, Вашингтон ҳусийлар ҳужумларига қарши ҳарбий ёрдам кўрсатиш борасидаги сўровларга ҳозирча эҳтиёткорлик билан ёндашмоқда. АҚШ Саудия Арабистонига ҳарбий маслаҳатчилар юборган.
Ҳужумлар хавфи валиаҳд шаҳзоданинг шахсий хавфсизлик чораларини ҳам кучайтирган. Нашр манбаларига кўра, 41 ёшли Муҳаммад бин Салмон кучли қўриқланадиган, бункерлар билан жиҳозланган саройлар ўртасида ҳаракатланмоқда ва махсус танланган хавфсизлик гуруҳи томонидан ҳимоя қилинмоқда.
Эслатиб ўтамиз, 10 октябрь куни Ар-Риёддаги асосий аэропортга уюштирилган ҳужум оқибатида 12 киши ҳалок бўлгани ва 309 киши жароҳатлангани ҳақида хабар берилган. Жабрланганлар орасида икки нафар Ўзбекистон фуқароси ҳам бўлиб, улар енгил тан жароҳатлари олган.
