Россияда мигрантлар учун имтиёз: айрим ишчилар рус тили имтиҳонидан озод қилиниши мумкин
Ички ишлар вазирлиги айрим мигрантларни рус тили, тарих ва қонунчилик бўйича имтиҳондан озод қилишни таклиф қилди.
Россия Ички ишлар вазирлиги устувор ривожланиш ҳудудларида фаолият юритадиган айрим меҳнат мигрантлари учун имтиҳон талабини бекор қилиш ташаббуси билан чиқди. Тегишли қонун лойиҳаси норматив-ҳуқуқий ҳужжатлар лойиҳалари порталида эълон қилинган.
Ҳужжатга кўра, иш берувчилар томонидан ишга жалб этиладиган ва ушбу ҳудудларда ишлаш учун рухсатнома олган хорижий фуқароларни рус тилини, Россия тарихини ҳамда қонунчилик асосларини билишини тасдиқлаш мажбуриятидан озод қилиш таклиф этилмоқда.
Устувор ривожланиш ҳудудлари Россиянинг айрим ҳудудларида инвестицияларни жалб қилиш ва иқтисодий ўсишни рағбатлантириш мақсадида ташкил этилган. Иқтисодий ривожланиш вазирлиги маълумотларига кўра, Узоқ Шарқда 16 та, Арктика зонасида эса иккита шундай ҳудуд мавжуд.
Россияда айрим тоифадаги хорижий ишчиларни тил имтиҳонидан озод қилиш амалиёти аввал ҳам қўлланган. 2025 йилда ҳукумат махсус квота асосида иш рухсатномаси оладиган мигрантларни имтиҳондан озод этиш бўйича қонун лойиҳасини тақдим этган. Мазкур ҳужжат ўша йилнинг июль ойида учинчи ўқишда қабул қилинган.
Шу билан бирга, бошқа тоифадаги хорижий фуқаролар учун имтиҳон талаблари кучайтирилган. 2025 йил 10 июлдан бошлаб рус тили имтиҳонида тинглаб тушуниш бўлимига оид талаблар оширилган, шунингдек, вақтинчалик ва доимий яшаш учун рухсатнома олиш имтиҳонларида тинглаб тушуниш ҳамда гапириш кўникмаларига қўйиладиган талаблар кенгайтирилган.
Россия Таълим ва фан вазирлиги маълумотига кўра, 2025 йил октябрь-декабрь ойларида 201,5 мингдан ортиқ киши иш рухсатномаси ёки патент олиш учун зарур бўлган рус тили даражасини тасдиқлаш мақсадида имтиҳон топширган. Уларнинг 35,5 фоизи биринчи уринишда имтиҳондан ўта олмаган. Бироқ имтиҳон топширганларнинг 87,9 фоизи якунда талабни бажарган.
