“Қайтиб бу ишни қилмайман”: 5-синф ўқувчиси қўшнисининг машинасини ҳайдади
Қўшнисига тегишли автомобилини бошқариб, видеони ижтимоий тармоққа жойлаган ўқувчи ва унинг онаси билан профилактик суҳбат ўтказилиб, қонуний чора кўрилди.
Сурхондарё вилояти Жарқўрғон туманида 5-синф ўқувчиси қўшнисига тегишли Spark автомобилини бошқаргани акс этган видео ижтимоий тармоқларда тарқалди. Вилоят Йўл ҳаракати хавфсизлиги бошқармаси ҳолат юзасидан изоҳ берди.
Маълум қилинишича, 19-мактаб ўқувчиси автомобилни ҳайдаб, бу жараённи тасвирга олган ва ижтимоий тармоққа жойлаган. Ҳолат кенг муҳокамаларга сабаб бўлган.
ЙҲХБ ходимлари вояга етмаган бола ва унинг онаси билан профилактик суҳбат ўтказган.
Ўқувчи онасининг айтишича, у ўғлининг автомобиль бошқарганидан бехабар бўлган. Бироқ фарзандининг машина ҳайдашга қизиқиши борлигини билган.
“Ўғлимнинг машина ҳайдашидан хабарим йўқ эди, лекин қизиқиши бор эди. Менинг битта ўғлим бор, ўқимишли бўлишини хоҳлайман. Инглиз тили, математика фанларига тўгаракларига берганман. Ўзидан катта болаларга қизиқиб, шу қизиқиши туфайли машина ҳайдашга ўтиб олган. Бундан кейин тарбиясига ўзим жавобгарликни оламан”, — деган у.
Она бундан кейин фарзандининг тарбиясига кўпроқ эътибор қаратишини билдирган.
Ўқувчи эса қилган ишидан афсусда эканини айтиб, бундай ҳолатни бошқа такрорламасликка ваъда берган.
“Мен Spark машинасини ҳайдаганман. Бундан афсусланаман. Қайтиб бу ишни қилмайман. Қоидаларни билмас эканман”, — деган у.
Шунингдек, у тенгдошларини ҳам бундай ҳаракатлардан тийилишга чақирган.
ЙҲХБ маълумотига кўра, ҳолат юзасидан қонуний чора кўрилган.
